Descrición
A dixitalización avanza sen pausa. Atórdanos a avalancha de datos e comunicación e, a un tempo, sentimos impotencia ante un tsunami de información que desprega forzas deformadoras e destrutivas. Actualmente, a dixitalización entrou xa na esfera política, onde provoca grandes distorsións no proceso democrático. As campañas electorais preséntanse como guerras de información nas que todo medio técnico e psicolóxico é válido. Nas redes sociais, empréganse contas ficticias automatizadas que divulgan fake news, impulsan campañas difamatorias e odio, e inflúen na formación de opinión política. As teorías da conspiración e a propaganda dominan o debate político. Con psicopolítica e psicometría dixital búscase influír nas decisións de voto e evitar as decisións conscientes.
Por primeira vez editado en galego, Byung-Chul Han describe neste último ensaio a actual crise da democracia e atribúea ao cambio estrutural da esfera pública na dixitalización. Esa crise ten un nome: infocracia.
Autoría
Byung-Chul Han
Byung-Chul Han (Seúl, 1959) é filósofo, teórico da cultura e ensaísta alemán de orixe surcoreana. En Friburgo e Múnic, estudou Filosofía, Literatura Alemá e Teoloxía Católica. Impartiu docencia universitaria en Basilea e en Karlsruhe, e ocupou a cátedra de Filosofía e Estudos Culturais da Universidade das Artes de Berlín. As súas publicacións, que, entre outros temas, abordan a crítica ao neoliberalismo e á sociedade do traballo, traducíronse a numerosas linguas; esta é a primeira vez que unha obra súa se edita en galego. Han é hoxe en día un dos filósofos máis destacados do pensamento contemporáneo. Como publicou El País, «O filósofo alemán vivo que máis se le en todo o mundo é coreano: Byung-Chul Han».
