A editora
Cooperativa
Catro Ventos Editora é unha cooperativa de traballo asociado sen ánimo de lucro fundada en Vigo en 2016 e constituída por cinco persoas socias, todas procedentes e especializadas en diferentes eidos, pero cuns valores e preocupacións comúns.
Misión
A idea de pór en marcha a editorial xurdiu da combinación de dous elementos igual de importantes: o desexo de poder desenvolver unha actividade profesional que non só sexa viable economicamente, mais tamén coherente cos principios éticos das persoas socias que participamos no proxecto; e a constatación de que existe un baleiro no mundo editorial galego nos eidos da economía social e da ecoloxía, malia o interese cada vez maior da sociedade en xeral por estas cuestións.
Visión
Desde o comezo tivemos claro que o noso era o modelo da economía alternativa e solidaria, no que os principios éticos, ambientais e sociais son cando menos igual de importantes cós principios económicos e profesionais.
Os 6 principios
Tomamos como punto de partida os seis principios establecidos pola Rede de Economía Alternativa e Solidaria (REAS). Podes ver o cumprimento dos mesmos no informe da auditoría social que fixemos en 2022.
EQUIDADE
Dentro do respecto das nosas diferenzas individuais, todas as persoas socias temos os mesmos dereitos na vida interna da cooperativa. Isto concrétase en: «unha voz, un voto», igualdade de oportunidades, participación, transparencia na información, etc.
TRABALLO XUSTO
Temos presentes as dimensións humana, social, política, económica, cultural e ambiental do traballo, e aspiramos a levar a cabo un labor estable e de calidade. Isto concrétase na igualdade salarial para todas as persoas socias.
COOPERACIÓN
Queremos fomentar a cooperación en lugar da competencia, promovendo o traballo cooperativo e as sinerxías con outras persoas e organizacións. Isto concrétase na participación en entidades como REAS e en proxectos conxuntos con outras entidades da economía social e solidaria.
SUSTENTABILIDADE AMBIENTAL
Toda a nosa actividade produtiva e económica ten a ver coa natureza, polo que trataremos permanentemente de reducir a nosa pegada ecolóxica e fomentar o consumo responsable. Isto concrétase na aposta polo uso de papeis certificados ou reciclados, de tintas vexetais e de cadeas curtas de produción (provedores de proximidade) e no estudo de vías para compensar as nosas emisións.
SUSTENTABILIDADE ECONÓMICA
Somos unha cooperativa sen ánimo de lucro, cremos na redistribución da riqueza que xeramos, na independencia política e ideolóxica, na transparencia e na xestión democrática, na sustentabilidade económica e no financiamento ético. Isto concrétase no reinvestimento de todos os posibles beneficios na propia cooperativa e en proxectos afíns.
COMPROMISO COA CONTORNA
Buscamos a participación no desenvolvemento local comunitario e sustentable, creando redes de acción común solidaria e aplicando o principio «Pensa global, actúa local». Isto concrétase na busca de provedores locais e na intención de conseguir un «retorno» á sociedade (proxectos de acceso libre e gratuíto a contidos relacionados cos temas que tratamos na editorial).
Somos socias
Persoas socias
Alicia R. Malga
Deseñadora e encargada de produción, lectora empedernida, chelista…
Aínda que a miren mal, encántalle a choiva. Este é o pais da choiva, non?
Isidro Dozo
Deseñador / comunicador, dixital até a medula, lector de banda deseñada…
Cando está co teléfono móbil, está traballando. En serio.
María Mediero
Tradutora de italiano, portugués e inglés. Entusiasta das linguas, consumidora cada día máis responsable (e, daquela, menos consumidora) e lectora acérrima de todo o que acaba nas súas mans.
Ela nunca ten frío! Pode ler e corrixir en manga curta todo o ano.
Miguel Braña
Tradutor de inglés e francés. Socio de Fiare Banca Etica, Nosa Enerxía e Eticom; membro de EQUO.
As Canarias son a súa segunda casa (ou a primeira). Así sorrí tanto!
Patricia Buxán
Doutora en tradución e interpretación especializada en tradución técnica e tradución editorial do alemán e o inglés para o galego e o español.
Eficaz, eficiente e moi traballadora. Cando lle deixan traballar, claro.