Descrición
O agro galego é un terreo fértil en saberes. É coma unha grande universidade chea de mestras e mestres sabios dispostos a compartir parte do que levan aprendido da terra.
Estes son os protagonistas de Polo rego:
- Carme (mestra de Sabores e Saberes)
- David (mestre de Podas e Pragas)
- Lola (mestra de Cestaría)
- Patri (mestra de Plantas Silvestres)
- Rosendo (mestre de Agricultura Sustentable e Xardíns)
- Yago (mestre de Horta na Casa)
Son persoas que traballan o campo, por oficio ou como unha afección de proveito, cunha especial paixón e experiencia nas plantas, na horta e nos seus froitos. Todos eles son quen de transmitir o que saben de xeito sinxelo, sen reviravoltas, pero con entusiasmo, sentido do humor e o seu toque persoal.
Este libro recolle o mellor da 1.ª tempada do programa televisivo da TVG, con consellos sobre agricultura sustentable e xardinaxe, propostas de cestaría, trucos e remedios para a horta e as pragas, receitas para os froitos que nos dá a terra, información útil sobre a compostaxe, ideas para aproveitar os beneficios das plantas silvestres e moitos coñecementos e suxestións sobre as posibilidades do campo e da natureza. Con este libro entre as mans, todo vai ir polo rego!
