Descrición
Na miña cona non manda ninguén. Así se podería resumir a máxima que guía a autora nesta obra gráfica de humor cáustico e documentación precisa. Velaquí en edición galega o maior éxito internacional da feminista e debuxante sueca Liv Strömquist.
Ao longo dos capítulos, Strömquist debulla os terribles mecanismos patriarcais de patoloxización do corpo e da sexualidade das mulleres. Comeza polo top-7 dos homes que se interesaron de máis por iso que se adoita designar «órgano sexual feminino». Son temas, entre outros, o sistema sexual binario, as intervencións cirúrxicas en bebés intersexo, o clítoris e os orgasmos vaxinal e clitorídeo. Máis adiante, dedica un capítulo á menstruación e á construción do noxo. Basta analizar o discurso perverso da publicidade de compresas e tampóns que vende «limpeza e seguridade» para recoñecer a súa actualidade.
Neste colorido mosaico que vai desde a Grecia antiga até a actualidade, a autora desvela séculos de represión sexual e rompe con numerosos prexuízos. Fronte á conceptualización dos xenitais das mulleres como algo incompleto, Strömquist recolle un vasto repertorio de exhibicións da vulva en diferentes culturas e momentos históricos.
A obra de Strömquist podería cualificarse de cómic-ensaio: usando o debuxo, con moito humor e retranca, a autora condensa aquí perfectamente un extenso traballo investigador.
Booktrailer
En febreiro de 2021 publicamos a nosa primeira banda deseñada: A froita do coñecemento, un traballo proposto por David A. Álvarez, que traduciu dende o sueco este libro que fala da cona. E lo, non se fala abondo dela? Pois si, pero sen saber. O patriarcado sempre tivo moito que dicir sobre a cona pero… ás mulleres pouco lles preguntaron ao respecto.
Velaquí o booktrailer desta banda deseñada no que tradutor e editora (Patricia Buxán) achegan algunhas reflexións sobre esta banda deseñada que non só ilustra, tamén fai escachar coa risa e mesmo anoxarse un pouco con algún que outro personaxe.
Autoría
Liv Strömquist
Liv Strömquist, nada en 1978 en Lund (Suecia), é unha das autoras de banda deseñada feminista máis influentes da escena internacional. Licenciada en Ciencias Políticas, traballa na radio e colabora como ilustradora para diferentes revistas e xornais do seu país. Como activista (sobre todo nos eidos do feminismo e das políticas de asilo), Liv emprega o cómic para elaborar ensaios gráficos sobre diferentes temáticas sociais que aborda cunha documentación minuciosa, con ironía e moito humor, e con referencias heteroxéneas, desde a cultura pop até a Biblia.
David Á. Álvarez Martínez
David A. Álvarez Martínez, nado en Salvaterra, á beira do Miño, medrou cerca do Ulla, na Estrada. Licenciado en Filoloxía Alemá e Inglesa pola USC, exerceu a docencia de linguas estranxeiras en Alemaña, Madrid, Suecia e nos últimos anos xa en Galicia na EOI. É socio fundador da Asociación Galega de Xermanistas e actual secretario. Formouse paralelamente cun máster en tradución e conta con varios títulos de ficción traducidos desde o sueco, o noruegués e o alemán.
