Comezamos 2023 traballando nas novidades editoriais para este ano. Este primeiro trimestre sempre é o máis tranquilo do ano no que se refire a presentacións, pero houbo novas relacionadas con Podas e enxertos e Comando Igualdade.
Podas e enxertos
Após coller algo de folgos en xaneiro, o día 13 de febreiro presentamos Podas e enxertos no Liceo de Ourense. Alí falamos da obra, un manual práctico que nos axuda a coidar das froiteiras, das ornamentais e outras plantas das nosas eiras e contorna para mantelas sans e abondosas, co autor, Rosendo Luis Estévez Parada.
O día 21, entrevistaron a Rosendo no programa A tarde da CRTVG. Podes escoitalo aquí (a partir do minuto 39).
Comando Igualdade
Por outra banda, as nosas autoras Chis Oliveira e Priscila Retamozo falaron no programa de RNE (Radio Nacional de España) «Sin género de duda» da edición en castelán de Comando igualdade, obra publicada orixinalmente en galego pola nosa editora.
